ഇലക്ട്രോണിക്സ് ചെറുകിട സംരംഭങ്ങൾ - 1

 

ഞാൻ തുടങ്ങാനായി പ്ലാനും പദ്ധതിയുമെല്ലാം തയ്യാറാക്കി വച്ചിരുന്ന നൂറുകണക്കിന് ഇലക്ട്രോണിക്സ് ബിസിനസ് ഐഡിയകൾ ഉണ്ട് .പല പല കാരണങ്ങളാൽ അവയൊന്നും നടക്കാതെ പോയി.

അവയിൽ പലതും ടെക്നോളജി മാറിയപ്പോൾ കാലഹരണപ്പെട്ടു പോയി. മറ്റ് പലതും ആരും ഇത് വരെ തുടങ്ങിയുമില്ല.

അത്തരം ചില വ്യവസായം പദ്ധതികൾ ഓരോന്നായി സമയം കിട്ടിമ്പോലെ ഇവിടെ എഴുതാം. നിങ്ങളിൽ ആർക്കെങ്കിലും ഇവയിൽ നിന്നും ചില സ്പാർക്കുകൾ കിട്ടിയേക്കാം.

കുറഞ്ഞ ചിലവിൽ തുടങ്ങാൻ സാധിക്കുന്ന ഇലക്ട്രോണിക്സ് വ്യവസായങ്ങൾ.പാർട്ട്-1

ബസർ/ ബീപ്പർ നിർമാണം

വാഹനങ്ങളുടെ സൈഡ് ടേൺ ഇൻഡിക്കേറ്ററുകൾ ഇടുമ്പോൾ അത് പ്രവർത്തിക്കുന്നുണ്ടെന്ന് ഡ്രൈവറെ അറിയിക്കാനും, ആവശ്യം കഴിഞ്ഞാൽ ഓഫ് ചെയ്യാനുള്ള മുന്നറിയിപ്പ് നൽകാനുമായി വാഹനങ്ങളിൽ വിട്ട്, വിട്ട് ബീപ്പ്, ബീപ്പ് ശബ്ദം പുറപ്പെടുവിക്കാൻ ഈ ഉപകരണം കൂടുതലായി ഉപയോഗിക്കുന്നു.

ടൂ വീലറുകൾ അലക്ഷ്യമായി വാട്ടർ സർവ്വീസ് ചെയ്യുമ്പോഴും, മഴ നനഞ്ഞും ഇവ ഇടയ്ക്കിടെ തകരാറിലാകാറുണ്ട്. അതിനാൽ ഇരുചക്ര വാഹനപ്പെരുപ്പമുള്ള കേരളത്തിൽ ഇതിൻ്റെ നിർമ്മാണത്തിന് നല്ല സ്കോപ്പുണ്ട്.

ഇരട്ടിയിലധികം മാർജിൻ ലഭിക്കുന്ന ഒരുൽപ്പന്നമാണ് ഇത്തരം ഇലക്ട്രോണിക് ബസറുകൾ.

നിർമ്മാണ ചിലവ് വളരെ കുറവുമാണ്.

വാഹനങ്ങളിൽ കൂടാതെ, ഇൻവെർട്ടറുകൾ, UPS,തുടങ്ങിയവയിലും ഓവർ ലോഡ്, പവർ കണ്ടീഷൻ തുടങ്ങിയവയുടെ ഓഡിയോ ഇൻഡിക്കേറ്ററായി ബസറുകൾ ഉപയോഗിക്കുന്നു.

ഫിറ്റ് ചെയ്യുന്ന ക്യാമ്പിനെറ്റിൽ അൽപ്പം വ്യത്യാസങ്ങൾ വരുത്തിയാൽ ഈ ബസറിനെ 110 ഡസിബൽ ശബ്ദം പുറപ്പെടുവിക്കുന്ന അലാറമായി മാറ്റാനും സാധിക്കും.

ഇതുപയോഗിച്ച് ടിപ്പറുകൾ ,മറ്റ് വാഹനങ്ങൾ തുടങ്ങിയവയുടെ റിവേഴ്സ് ഹോണായും, ഹെവി എർത്ത് മൂവിങ്ങ് എക്യുപ്മെൻ്റുകൾ, ഫോർക്ക് ലിഫ്റ്റ്, ക്രയിനുകൾ തുടങ്ങിയവയുടെ റൊട്ടേഷൻ പെരിഫറൽ വാണിങ്ങ് ഡിവൈസായും ഉപയോഗിക്കാം.

പാനിക് സയറൺ,സെക്യൂരിറ്റി അലാം മേഖലയിലും നല്ല വിപണി ഉണ്ട്.

സൈക്കിൾ ഹോൺ, ഗ്ലാസ് ബ്രേക്ക് ഡിറ്റക്റ്റർ, വൈബ്രേഷൻ സെൻസർ, മെക്കാനിക്കൽ ഷോക്ക് സെൻസർ തുടങ്ങിയ മൂല്യവർദ്ധിത ഉപോൽപ്പന്നങ്ങളും ഇതിൻ്റെ ഭാഗമായി നിർമ്മിക്കാം.മൂല്യ വർദ്ധിത ഉൽപ്പന്നങ്ങൾ നിർമ്മിച്ചാൽ 10 ഇരട്ടി വരെ വരുമാനം ലഭിക്കാം.

വൈബ്രേഷൻ സെൻസർ, ഗ്ലാസ് ബ്രേക്ക് സെൻസർ,മെക്കാനിക്കൽ ഷോക്ക് സെൻസർ തുടങ്ങിയവയുടെ ഏതാനും സർക്യൂട്ടുകൾ അടുത്ത മാസം ഇവിടെ ഇടാം.ഒരു വാഹനാപകടത്തെ തുടർന്ന് കിടപ്പിലായതിനാൽ ലാബിൽ കയറി ഇവയൊന്നും ചെയ്ത് നോക്കാൻ സാധിക്കുന്നില്ല. ഉണ്ടാക്കി പരീക്ഷിച്ച ശേഷം സർക്യൂട്ട് ഇടാം.

ഇതിനാവശ്യമായ അടിസ്ഥാന അസംസ്കൃത പദാർത്ഥം പീസോ ഇലക്ട്രിക് ബസർ പ്ലേറ്റാണ്.പിന്നെ ഇത് ഫിറ്റ് ചെയ്യാനുള്ള വിവിധ തരം ക്യാബി നെറ്റുകൾ ,PCB, ട്രാൻസിസ്റ്റർ മുതലായ ഇലക്ട്രോണിക് കോമ്പോണെൻ്റുകൾ തുടങ്ങിയവയാണ്.

എറണാകുളത്ത് റോണി ഇലക്ട്രോണിക്സിൽ ഇവയെല്ലാം ലഭിക്കും

വളരെ പരിമിതമായ മുടക്കുമുതൽ മതി,കുറഞ്ഞ മാനുഷിക അധ്വാനത്തിൽ ചെയ്യാം, കുറഞ്ഞ വൈദ്യുതി ഉപയോഗം മൂലം പ്രത്യേക കണക്ഷൻ എടുക്കാതെ വിടുകളിൽ കുടിൽ വ്യവസായമായി ചെയ്യാം, മലിനീകരണ പ്രശ്നങ്ങൾ ഒന്നുമില്ലാത്തതിനാൽ പരിസരവാസികളുടെ NOC വേണ്ട എന്നിങ്ങനെ നിരവധി പോസിറ്റീവ് സൈഡുകൾ ഉള്ളതിനാൽ, അംഗ പരിമിതർക്കും, സ്ത്രീകൾക്കും ഇതിൻ്റെ നിർമ്മാണം നല്ലൊരു ജീവന ഉപാധിയായിരിക്കും.

ഓട്ടോമൊബൈൽ കടകളിലും,വർക്ക്ഷോപ്പുകളും, ഇൻവെർട്ടർ, സെക്യൂരിറ്റി അലാറം പോലുള്ള ഇലക്ട്രോണിക് ഉപകരണ നിർമ്മാതാക്കളുമാണ് പ്രധാന ഉപഭോക്താക്കൾ. എൻഡ് കസ്റ്റമർ മാരെ നേരിട്ട് കണ്ടെത്താൻ സാധിച്ചാൽ വിപണനം വളരെ എളുപ്പമായിരിക്കും.

ഷോപ്പുകളിൽ വിൽപ്പനയ്ക്ക് ഏൽപ്പിച്ചാൽ പണം തിരികെ വരാൻ വളരെ ബുദ്ധിമുട്ടാണ്.

നല്ല ഒരു ബ്രാൻഡ് പേരും, ആകർഷകമായ പാക്കേജിങ്ങും ഇതിൻ്റെ വിപണനത്തിന് അത്ര പ്രാധാന്യമില്ല എങ്കിലും ഉണ്ടെങ്കിൽ വിപണി പിടിക്കാൻ എളുപ്പമായിരിക്കും.

ഇലക്ട്രോണിക്സ് കേരളം ,ഇലക്ട്രോണിക്സ്, മലയാളം പോലുള്ള ഫേസ്ബുക്ക് പേജുകളിൽ പരസ്യങ്ങൾ കൊടുക്കുന്നത് വേഗത്തിൽ ആവശ്യക്കാരിലേക്ക് ഉൽപ്പന്നത്തിൻ്റെ വിവരങ്ങൾ എത്താൻ സഹായകമാകും.എഴുതിയത് അജിത് കളമശേരി 29.11.2023